As torres do Allo voltan a ser este verán escenario da segunda edición da “Escape Room” que tanto éxito acadou na temporada pasada. Trátase dun xogo de escapismo para realizar en grupos e baixo reserva no que os participantes terán que atopar o xeito de escapar do pazo nun tempo límite. A proposta, con temática totalmente renovada, está especialmente dirixida a aquelas persoas máis aventureiras que queiran coñecer o pazo e o seu entorno nun ambiente divertido e gozar dunha experiencia activa, esixente e lúdica.

A través dunha historia ficticia ambientada no pazo como marco da acción, os equipos terán que resolver probas, abrir cadeados e descifrar códigos para poder escapar do pazo nun tempo limitado. A actividade é de balde, para grupos entre 2 e 10 persoas e terá lugar do 30 de xullo ata o 15 de setembro. O horario establecido é de martes a sábado ás 16 h., baixo reserva previa no enderezo electrónico info@torresdoallo.gal.

Ademáis, as torres do Allo continúan co desenvolvemento da súas actividades habituais do verán: visitas teatralizadas dos Quinquilláns todos os domingos de xullo e agosto ás 19:30 h., visitas guiadas ás torres todos os días ás 13 h. e ás 17:30 h., o xogo de pistas en familia todos os días no horario de apertura do pazo e o III Concurso de Fotografía Móbil “Enfoques do Allo”. Todo isto e moitas cousas máis agárdante nas torres do Allo no verán 2019!

Comeza a segunda edición do xogo de escapismo do primeiro “Pazo Escape” do mundo
Tagged on: